Сёння – 21 лютага – Беларусь разам з усім светам адзначае Дзень роднай мовы. Афіцыйным святам ён стаў 20 год таму. Згодна з дадзенымі ЮНЭСКА, зараз існуе каля 6 тысяч розных моў. Мэта гэтага дня – прыцягнуць увагу да кожнай мовы і захаваць культурную разнастайнасць на планеце. Беларуская мова – адна з самых мілагучных, а яшчэ яна найбольш старажытная сярод славянскіх. На ёй размаўляюць больш за 6 мільёнаў чалавек у Беларусі і за яе межамі. Да святкавання далучыўся і наш тэлеканал.

Рыфмаваць радкi Цімафей пачаў яшчэ ў школе. Але захапленне паэзіяй прыйшло ва ўніверсітэце, калі моцна сумаваў па дому. А зараз пяшчотныя радкі пра Баранавічы для юнака сталi любімымi. 

Любоў да роднай мовы дапамагла і ў навуцы (за спінай першакурсніка эканамічнага факультэта – дзясяткі алімпіяд, навуковых прац). Сёння яшчэ адно натхненне – разам з сяброўкай паcпрабавалi на Агульнай дыктоўцы.  

На моўным экзамене сустракалі ўдзельнікаў «Купалінкай» у выкананні кітайскіх студэнтаў. Але на гэтым сюрпрызы не скончыліся. У ролі настаўніка толькi сення – акцёр Купалаўскага тэатра Павел Харланчук. Мама і бабуля акцёра – выкладчыкі, а таму ўдзельнiкам давялося крыху пахвалявацца. Ды і тэкст дыктоўкі – архіўны ліст Уладзіміра Караткевіча пра каханне – крануў кожнага. 

А вось у Мацвея таксама адказная місія. Сёння ён – мадэратар квізу па гісторыі Сінявокай на журфаку. Ад азербайджанскай, іспанскай і нямецкай – да карэйскай, шведскай і хіндзі. Сапраўдны паэтычны сюрпрыз падрыхтавалі дыпламаты. У Нацыянальнай бібліятэцы сёння ўся разнастайнасць моў свету. 

Менавіта ў мове яны бяруць моц і любоў для таго, каб наладжваць узаемапаразуменне паміж краінамі. Канешне, вывучаюць беларускую, каб зразумець душу народа. Пасол Швецыі Крысціна Юханэсан – лінгвіст па адукацыі. Прыехала ў Мінск з ідэальнымі ведамі рускай мовы. Зараз вывучае беларускую. І здаецца, той факт, што адзначае дзень нараджэння менавіта ў  Дзень роднай мовы, неяк палягчае працэс. 

Дзень роднай мовы – гэта яшчэ i час запуску новых праектаў. Дзякуючы кампанii A1, якая дапамагае папулярызаваць родную мову, вясной у Мінску і абласных цэнтрах краіны з’явіцца серыя арт-інсталяцый пад назвай «МОВА». 

Куды толькi сёння моўны марафон не зазiрнуў. Сустрэў яго i Віцебскі дзяржаўны ўніверсітэт. Майстар-клас ігры на музычных інструментах, знаёмства з прадметамі быту. На cвяточнай лекцыі чыталi вершы класiкаў, захапляліся сучаснымі аўтарамі, але не ва ўсіх студэнтаў вельмі добра атрымлівалася адразу. Асобны квэст для тых, хто толькі пачынае вывучаць нашу культуру, а такіх тут набралася з 26 краін.

Наша мова ў святочны дзень гучыць і ў іншых краінах. Адна з самых вялікіх – беларуская суполка ў Расіі. Паводле афіцыйных звестак, у краіне пражываюць больш за 500 тысяч нашых суайчыннікаў. Кожнаму з іх сёння ў Маскве прапанавалі здзейсніць своеасаблівае падарожжа ў беларускую Неглюбку, што пад Гомелем. Праўда, зазірнуць у глыбінку можна было толькі па фотаздымках. Родныя мясцiны – вачамі мясцовага фатографа Фёдара Кавалёва. Але для каларыту і гэтага было дастаткова – здымкаў набралася каля паўсотні.

Яшчэ змаглі атрымаць асалоду гукамі роднай мовы –  у прафесійным выкананні акцёрамі Рэспубліканскага тэатра беларускай драматургіі. 

Беларуская, руская, англійская або кітайская мова – у кожнай з 6 тысяч моў асаблівае гучанне. Але са словамі класіка не паспрачаешся: «Трэба знаць суседскую мову, але найперш трэба знаць сваю».