У Міністэрстве замежных спраў на афіцыйным узроўні сёння гучала выключна беларуская гаворка. Акцыяй-дыялогам ў знешнепалітычным ведамстве ўпершыню адзначылі Дзень роднай мовы. У румын і палестынцаў ён, вядома, свой. Усё ж такі свята усталявана рашэннем ЮНЕСКА. Аляксандр Мацяс пачуў «дзеканне» і «цеканне» з вуснаў пасланнікаў іншых народаў.

Міністр замежных спраў можа лёгка чытаць і па-нямецку, і па-англійску. Само сабой, па-руску. Але ж сёння спадара Макея наўрад ці зразумелі б. Усё ж такі вечарына да Дня мовы, якой Купала пісаў. «Магутнае слова, ты, роднае слова!» – зараз амаль для 10 мільёнаў носьбітаў.

Тэмай міжнароднага праэкта, які нарадзіўся ў сценах мінскага музея Купалы і сёння ўпершыню выйшаў за іх, стала любоўная лірыка паэта. Дарэчы, у нашай мове словы «любоў» і «каханне» не сінонімы. Любіць можна маму, Радзіму, а кахаць толькі жанчыну.

Сёння па куплеце калі не ўсяму свету, то амаль усім кантынентам. Да «дыялогу культур» запрасілі 18 дыпламатаў, акрэдытаваных у Беларусі. Нават суседзям было нескаладана з выключна нашым «у нескладовым». Іспыт, як некалі ля школьнай дошкі.

Менавіта Купала першым пераклаў на беларускую Інтэрнацыянал з французскай – мовы арыгінала. Дапамагла цешча – Эмілія з роду Манэ. Па мiлагучнасці наша гаворка сёння саступае толькі італьянскай. Такі вынік конкурса прыгажосці, праведзенага ЮНЕСКА.

А ці ведалі вы, што ў Бразіліі з творчасцю Купалы пазнаёміліся яшчэ пры яго жыцці. У 1932-м у горадзе Порту-Алегры нашай дыяспарай была створана бібліятэка-чытальня, якой далі імя песняра. Дарэчы, таксама выключна нашае слова. Зараз Купала – самы ўшанаваны беларус у свеце: помнікі ля Нью-Йорка і ў Маскве.

Скажаце: Купала – дыпламат! У гэтым ёсць рацыя. Менавіта ён самы перакладаемы паэт Беларусі. Адзін верш «А хто там ідзе?» сёння гучыць на 85 мовах свету без уліку яшчэ непрэзентаваных варыянтаў на шведскай і фарсі.

Гэта Купала ўвёў у зварот новае слова «розгалас», якое падхапіў паэт «чыстае красы» з берагоў Волгі. Хутка 125 год з дня нараджэння Максіма Багдановіча – таксама аднаго з пачынальнікаў новай літаратурнай мовы. Дзякуючы якой, для ўсіх мы – беларусы!

Падрабязнасці – у відэасюжэце нашага карэспандэнта